CEBU, Philippines – Gipasanginlang drug pusher nakaikyas apan napatay ang iyang kauban sa mga sakop sa Provincial Anti-Illegal Drugs Special Operations Task Group human giingong misukol kanila dihang gilusad ang buy-bust operation diha sa barangay Lourdes, Bogo City.
Ang namatay naila nga si Randy "Itang" Lobitaña, nagpuyo sa maong dapit human gikatahong mibunot kini og armas atol sa buy-bust.
Samtang ang nakaipsot mao si Mikee Montealto, gidudahang drug pusher, human nga nakabantay siya nga polis diay ang nangabot nga kostumer.
Matud pa ni Senior Police Officer 1 Reynaldo Solante, team leader sa PAIDSOTG, gihimo ang buy-bust sa balay nga giabangan ni Montealto diin gipalitan nila kini og bale og P10 mil nga kantidad sa shabu.
Apan sa pagtunol sa mga sakop sa PAIDSOTG nakabantay si Montealto ug midagan padulong sa ngitngit nga bahin sa likod sa balay.
Sa pagkabantay ni Lobitaña sa mga polis gikatahong mibunot kini sa iyang .9mm nga pistola ug miaksyon og pusil sa mga polis.
Sumala pa ni Solante dunay laing lima ka mga kauban ni Lobitaña apan siya lang maoy nakit-an sa mga sakop sa kapolisan nga nibunot og armas.
Gidala pa unta siya sa Cebu Provincial Hospital sa Bogo City apan gideklarar na siya nga dead on arrival.
Nakuha gikan sa balay ni Montealto ang upat ka bulto nga shabu nga mobalor og P120,000; usa ka AR15 Rifle; ug .45 caliber nga pistola samtang narekober gikan ni Lobitaña ang usa ka .9mm nga pistola.
Nakakuha sab ang mga taga PIB ug daghang mga resibo sa money remittance company ug listahan sa mga utangan ni Montealto, ang iyang sports utility vehicle nga abli pa ug nag-andar pa ug ang motor ni Lobitaña.
Si Lobitaña mao ang gikatahong hitman sa grupo ug mao ni motira sa mga wala mamayad sa ilang gipanguha nga shabu. - /EIM) (BANAT NEWS)