CEBU, Philippines – Gikawatan sulod sa Talisay District Hospital sa barangay San Isidro ang usa ka lalaki samtang nagbantay og pasyente niadto’ng Domingo sa kaadlawon.
Ang biktima nailhan nga si Jaypee Talido, 23, ulitawo nga taga Kimba, Cansojong sa mao’ng dakbayan.
Matud sa biktima nga nahinabi sa Banat News nga nagbantay siya sa iya’ng uyab nga adunay sakit nga dengue apan gumikan sa iya’ng kaduka siya nakatulog tupad sa hinigugma.
Kompiyansa ang biktima sa iya’ng mga butang ug pitaka nga naa ra sa iya’ng tupad.
Sa diha’ng gipukaw siya sa usa ka nurse aron pag-asistar sa pasyente, wala na sa iya’ng gibutangan ang iya’ng pitaka nga adunay sulod nga P900 cash, mga IDs ug ang iyang power bank.
Gisumbong sa biktima ang iya’ng nahiaguman sa guwardiya apan wala sila’y natudlo’ng suspek hinungdan nga sa polis niya kini gipahibawo.
Nagduda ang biktima nga laing tigbantay sa pasyente ang nikawat sa iya’ng mga butang.
Samtang ang guwardiya nga si Jake Manondo ang niingon nga wala’y CCTV camera ang hospital ug sayon ra nga makasulod ug gawas ang mga tawo.
Ang pasyente ni Talido ang diha ra gibutang sa agianan tungod sa kakuwang og kwarto niini. - /GMR) (BANAT NEWS)