CEBU, Philippines – Usa ka Swiss national ang milusad sa iyang libro nga gisuwat kabahin sa kasaysayan ug kultura sa lungsod sa Argao diin maggikan si Gob. Hilario Davide III ug si anhing Press Secretary Cerge Remonde.
Ang “Argao: A Usable Past” gisuwat kini ni Paul Gerschwiler kinsa nangangkon nga ang Argao maoy ikaduha na niyang pinuy-anan sukad pa niadtong tuig 2002.
Si Bise Gobernador Agnes Magpale nagpasalamat sa Ramon Aboitiz Foundation Inc. (RAFI) sa pag-publikar sa libro pinaagi sa ilang Culture and Heritage Unit.
Ang RAFI maoy nitabang sa kagamhanan sa probinsiya aron masuwat ug mapublikar ang 55 ka volumes nga libro kabahin sa kasaysayan sa kalungsuran sa probinsiya.
Si Magpale nanghinaot nga dili lang unta ang mga Argawanon apan ang tanang Sugbuanon mobuhat sa gihimo ni Gerschwiler.
Si Gerschwiler nagpasalamat sa mga higala niyang Sugbuanon sa suportang iyang nadawat samtang naghimo siya sa maong libro.
Ang presidente sa RAFI nga si Roberto Aboitiz nagkanayon nga ang libro ni Gerschwiler naghatag og garbo isip Sugboanon.
Si Jon Ramon Aboitiz nagkanayon mahatagan og dugang kaalam ug impormasyon kabahin sa kasaysayan sa Argao ang mga makabasa sa maong libro.
“Argao: A Usable Past” gidesinyo kini isip user-friendly ug ang 45 ka barangay sa lungsod lakip na ang ubang kalungsuran makabaton og mga kopya niini. (BANAT NEWS)