Gale warning giisyu sa PAGASA

CEBU, Philippines –  Ang Pagasa- Mactan naghatag og gale warning sayo sa buntag kagahapon diin ang mga sakyanan sa kadagatan gidid-an sa pagbiyahe tungod sa kadagku sa balud.

Si Manny John Agbay sa PAGASA, Mactan mibutyag nga kagahapon sa alas 5:00 sa buntag nila  gipagawas ang gale warning.

Awtomatiko nga dili pabiyahion ang mga sakyanan sa kadagatan kung dunay gale warning paglikay sa disgrasya.

Ang maong gale warning posibleng malibkas kini sa sunod semana pa tungod kay ang bagyo mopundo pa kini pipila ka adlaw sa Philippine Area of Responsibility (PAR).

Gipasabot ni Agbay nga si Lando dili makagawas dayon sa PAR tungod kay napugngan kini sa hanging amihan. Gawas niini ang amihan nikusog tungod sa high pressure nga nasinati karon didto sa nasud sa Korea.

Ang kinatibuk-ang Visayas lakip na niini ang Sugbo makabaton og mapanganurong kalangitan inubanan sa mahinay ngadto sa kasarangang pag-uwan ug panagsa nga panugdog ug kilat.

Sa laing bahin, duha ka mananagat ang nangalunod ug naluwas kagahapon sa buntag diha sa kadagatan sa Psalm Base, Barangay Poblacion, dakbayan sa Talisay.

Ang duha mao sila si Carding Base ug usa ka  Arnel padung na untang modunggo human namukot dihang nasudlan og tubig ilang sakayan.  (BANAT NEWS)

Show comments