CEBU, Philippines – Nakabaton og mga samad ug bun-og sa kalawasan ang usa ka biyuda nga gibunalbunalan og kahoy sa duha ka lalaki nga nitulis niini sulod sa ila’ng panimalay sa barangay Pitogo, lungsod sa Consolacion alas 7 pasado sa niagi’ng gabii kinsa ang mga suspek nadakpan usab sa kapolisan.
Si Police Officer 1 Retchie Guilleran sa Consolacion Police Station niila sa biktima nga si Gwendolyn Perez Ueno, 55, lumad nga taga Cagayan de Oro City nga nag-abang og apartment sa nahisgutang dapit.
Matud ni Guilleran nga nabulabog ang gihimo sa mga suspek diha’ng pipila ka molupyo ang nakamatikod lakip na sa pipila ka habal-habal drayber nga nahiagi sa mao’ng dapit hinungdan nga nagdali sa pagsibat nga wala’y nadala’ng salapi gikan sa biktima.
Usa ka habal-habal drayber ang nidala sa biktima sa tambalanan ug ang pipila kanila mao usab ang nitaho sa buhatan sa kapolisan.
Si Senior Inspector Wilson Abot, hepe sa kapolisan sa lungsod, mao’y nangulo sa follow-up operation nga niresulta sa pagkasikop sa duha ka suspek nga giila nga sila si Armand Tobes Cueno, 33, ug kauban nga usa ka Archie Bejos nga taga Catarman, lungsod sa Liloan.
Nadakpan ang duha sa ila’ng panimalay sa Pitogo, Consolacion ug diha’ng girekisa ang kalawasan, mao’y nakuha ang tagsa ka pakete’ng shabu nga gisulod sa mga bulsa niini. - /GMR) (BANAT NEWS)