Call center company gironda

CEBU, Philippines – Usa ka Amerkano ang gipasakaan og kaso diha sa Cebu City Prosecutor tungod sa pag-operate niini og call center company nga walay mga balidong permisyo.

Ang gikasohan mao si Jason Jeremiah Gentry  tungod sa kalapasan sa Article 40 in relation to Article 302 sa Presidential Decree 442 o ang Labor Code of the Philippines.

Base sa Labor Code, kinahanglan nga mokuha og permiso gikan sa Department of Labor and Employment (DOLE) ang usa ka langyaw nga buot magnegosyo dinhi sa Pilipinas.

Matud pa sa National Bureau of Investigation, si Gentry nagpadagan og call center company nga walay Alien Employment Permit (AEP)  gikan sa DOLE.

Ang NBI mironda sa establisamento ni Gentry niadtong Sabado sa gabii ug gikatahong naaktohan kining nag-interbyu og usa ka aplikante sud sa iyang buhatan diha sa Integricall BPO nga nahimutang sa Don Gil Garcia Street sa Barangay Capitol Site, Cebu City.

Matud pa aduna pay mga call center agents nga gikatahong naabtan sa NBI nga nagtrabaho niadtong mga orasa.

Ang NBI mironda sa maong kompanya ni Gentry human misang-at og reklamo ang kanhi employer sa suspek nga nag-operate usab og business process outsourcing (BPO) company.

Ang mireklamo batok kang Gentry mao si Oscar Razzour sa Avatar Technologies, Incorporated didto sa NBI-Western Visayas Regional Office (NBI-WEVRO) sa Iloilo City.

Matud pa sa reklamo nalapas ni Gentry ang non-disclosure, non-compete provisions sa kontrata niini sa kanhi employer ug nakalapas usab kini sa mga balaod sa Pilipinas.

Ang NBI-WEVRO daling nakig-alayon sa NBI-7 aron paghimo og imbestigasyon batok kang Gentry ug nasuta usab nga wala kini permiso gikan sa DOLE-7.

Ang NBI-7 daling nikuha og search warrant gikan ni Judge Samuel Malazarte sa Regional Trial Court Branch 15 sa Cebu City.

Nasakmit diha sa establisamento ni Gentry ang nagkadaiyang employment contracts  sa iyang mga kawani ug uban pang mga dokumento sa pagpadagan niya sa maong negosyo.

Si Gentry nagdumili paghatag og pamahayag kabahin sa reklamo nga gipasaka batok kaniya. (Gikan sa The Freeman/EIM)