Heneral Loot magmayor sa Daanbantayan

CEBU, Philippines – Human sa iyang pagretiro sa katungdanan isip heneral sa kapolisan niadtong Hulyo, magpapili sa pagkamayor sa lungsod sa Daanbantayan si Vicente “Vic” Loot, ang posisyon nga kanhi nakuptan sa iyang asawa nga si Ma. Luisa “Malou” Loot.

Pormal nga gipaila si Vic nga opisyal nga kandidato sa pagka-mayor sa lungsod atol sa general assembly sa One Cebu Party kagahapon.

Matud ni Loot nga mosang-at siya ug kaubanan sa ilang certificate of candidacy karong Huwebes, Oktubre 15 sa buntag sa buhatan sa Commission on Elections sa lungsod.

Iyang bise mayor si kanhi konsehal Simplicio “Boy” Mantos ug mga magpasubli sila si Konsehal Bregidorietta “Brigitte” Tancawan, Juanito Ybañez, Samuel “Sammy” Moralde, Jupiter “Jupjup” Rosell, Kapitan Rex Novabos, kanhi konsehal Mamerto “Mitong” Rodrigo, Kapitan Elver Ali Abucay ug kanhi konsehal Renato “Rene” Benatiro.

Ikaatbang ni Loot si Mayor Augusto “Itok” Corro sa Liberal Party kinsa mopasubli alang sa ikaduha’ng termino.

Tinguha ni Loot nga mapadayon ang naugmad nga kalambuan sa lungsod dihang ang iyang asawa ang mayor niadtong 1998 hangtud 2007.

Si Malou gipulihan sa iyang anak nga si Bokal Sun Shimura ug nibalik sa pagka-mayor sa 2010 ug napilde ni Corro sa 2013 nga eleksiyon.

Si Loot, 56, nag-alagad sa Philippine National Police (PNP) sulod sa 37 ka tuig ug niretiro isip chief superintendent nga may one-star nga ranggo.

Katapusang pwesto nga iyang nahuptan mao ang pagka-director sa PNP Training Service. -/EIM) (BANAT NEWS)