Comelec manawat na og COCs

CEBU, Philippines – Magsugod na karong adlawa pagdawat ang Commission on Elections og mga certificates of candidacies alang niadtong mga kandidatong nangambisyon og mga posisyon sa gobiyerno pinaagi sa eleksyon.

Sa samang higayon, ang kapolisan mo-deploy og mga sakop diha sa nagkadaiyang Comelec offices aron pagsiguro sa kahapsay ug kalinaw sa maong kalihokan.

Kini gumikan kay adunay mga supporters sa mga kandidato nga posibleng magkagubot kun magkadungan pagsang-at og kandidatura ilang mga kandidato.

Ang mga buhatan sa Comelec temporaryo usab mosuspenso sa pagpangrehistro og mga bag-ong botante ug kadtong mamalhin og address sulod sa lima ka adlaw sugod karong adlawa.

Si Atty. Fleur Ann Gujilde, Comelec officer sa dakbayan sa Mandaue nga nahinabi sa mga tigbalita miingon nga  bukas sa ilang buhatan  sa alas 8 sa buntag hangtod sa alas 5 ang takna sa hapon.

Sama sa gimando ni Comelec chairman Andres Bautista sa kaulohan, giawhag ang mga Comelec offices sa nasud nga limitahan ang pasudlong supporters sa mga kandidato sa ilang mga buhatan aron dili maghuot ug magkayagaw.

“Ang mga supporter nga mokuyog sa ilang gisuportahan nga kandidato mahimo nga magpaabot lang sa gawas sa maong buhatan,” ni Atty Gujilde pa.

Ang mga kandidato kinahanglang magdala og mga gikinahanglan nga dokumento nga naglakip na niini ang party nomination sa kandidato nga nagdala og partido, kinahanglang rehistrado silang botante sa dapit nga ilang daganan, natural –born Filipino , makamaong mobasa ug mosuwat, ug dili kombiktado sa kasong kriminal ug sibil.

Bisan pa man og wala mag-request og kapulisan ang Commission on Election, ang Cebu City Police Office mo-assign gihapon og mga sakop sa mga Comelec offices karong adlawa.

Si Senior Superintendent Marciano Batiancela, ang acting chief sa CCPO, nagkanayon nga sa iyang pagpakigtabi ni Cebu City North District Election Officer Marchel Sarno, wala kini makahisgot nga mag-request og kapulisan para sa filing sa COC karong semanaha.

“Tan-awon sad nato ang sitwasyon. Kung kinahanglan gyud og daghan, mahimo ra pud nato pun-an,” matud ni Batiancela. Apan ni-request hinuon si Sarno og upat ka polis aron mobantay sa sunod semana ini og kahuman sa filing sa COCs tungod kay gipaabot nga modagsa na ang mga magparehistro aron makaapas sa deadline.

Si Batiancela miingon nga mag-meeting pa sila nila ni Sarno alang sa dugang nga pagpangandam sa umaabot nga eleksyon. - /EIM) (BANAT NEWS)