CEBU, Philippines - Kapolisan sa lalawigan gipahinumduman sa direktor niini nga dili magapil-apil sa politika ilabi na karon nga nagsugod na ang election season. Si Senior Superintendent Noel Gillamac, director sa Cebu Police Provincial Office, miingon nga mihatag na siya og direktiba sa mga hepe sa polis nga nagdili nila sa paglabot-labot sa politika.
Matud pa ni Gillamac nga isip mga polis dili sila angay nga moapil sa politika ug ilang tutokan ang pagpatunhay sa kahusay ug kalinaw sa ilang tagsa-tagsa ka lugar.
Dugang niya nga kun aduna man gani manghitabo kinahanglan nga subayon lang gyud sa kapolisan ang isyu ilabi na gayod sa isyu sa kahusay ug kalinaw.
Sa sunod semana mosugod na ang filing sa certificate of candidacy sa mga national candidates nga maoy mag-abli sa election season sa nasud.
Miingon si Gillamac nga dili sama sa dakbayan sa Sugbo nga usa lang ka mayor ang anaa, sa lalawigan may 40 kapin ka mga mayor hinungdan nga daghan kaayo og taho nga madawat ang kapolisan.
“Stick to the issue, and amo is non-partisan…let justice go on without political parties,” matud pa ni Gillamac. (BANAT NEWS)