Nanglugos og 15 anyos gidakop

CEBU, Philippines - Lalaking gipasanginlang nilugos og 15 anyos gidakop sa kapolisan sa Presinto 1 sa Mandaue City Police Office (MCPO)  diha sa barangay Alang-Alang sa maong dakbayan. Ang gidakop mao si Zaldy Deñega, 39, taga Poblacion, lungsod sa Tuburan ug piniyalan sa boarding house nga gipuy-an sa biktima.

Ang biktima maoy gisaligan sa pag-atiman sa usa ka tigulang babaye nga nagpuyo usab sa usa sa mga lawak sa nahisgotang boarding house. Si Police Officer 3 Joylyn Mahilom sa Women’s Section sa Presinto 1 miingon nga nagsugod pa niadtong miaging bulan ang pagpanglugos sa suspek ngadto sa biktima.

Matud pa ni Mahilom giagwanta lang kadto sa biktima tungod sa kahadlok nga tinud-on ang hulga nga adunay dautang mahitabo kaniya.

Apan niadtong Miyerkules sa gabii human siya giusban paglugos sa suspek sekretong migawas ang biktima ug midangop sa presinto hinungdan sa pagkasikop sa suspek.

Kasong rape in relation to Republic Act 7610 kon Child Abuse ang ipasaka batok sa suspek samtang ang biktima gikostudiya na sa Department of Social Welfare and Development.  (BANAT NEWS)