CEBU, Philippines - Pipila na lang ka buwan sa dili pa ang International Eucharistic Congress 2016 nga ipahigayon sa dakbayan sa Sugbo, ang kadagkuan sa South Road Properties kauban sa Archdiocese of Cebu nagsugod na sa pagtrabaho sa San Pedro Calungsod Template nga nahimutang sa SRP Mambaling Access Area.
Matud ni Roberto Varquez, manager sa SRP, nga nipahigayon na sila sa ila’ng leveling sa lugar aron ila’ng masayran kung asa dapit mobutang og drainage aron sa higayun nga adunay pag-uwan nga mahitabo dili magpundo ang tubig sa lugar.
Sumala pa ni Varquez nga human sa pag-level, isunod usab nila ang pagsemento sa pipila ka lugar nga posible’ng abagahon og pribado nga magpapatigayun.
Dugang pa ni Varquez nga on track sila sa pagtrabaho sa lugar gawas lang kung adunay pag-uwan-uwan nga mahitabo kay mahunong gyud sila sa pagtrabaho.
Samtang ang chairman sa Committee on Venue, Fr. Brian Brigoli, nitug-an sa Banat News nga nagsugod na usab sila og clearing sa San Pedro Template ug sa rehabilitation sa lugar.
Dugang ni Brigoli nga nagkatigum na sila kauban ang tanan nga iya’ng kauban alang sa pagtrabaho sa mga venue nga pagahimoan sa mga kalihukan sa IEC. (BANAT NEWS)