CEBU, Philippines - Daku ang pagkunhod sa gidaghanon sa mga biktima sa dengue sukad sa 2013 hangtud karong tuiga sa dakbayan sa Mandaue.
Kini ang gipadangat nga taho ni Mandaue City Health Officer, Dr. Edna Seno, sa buhatan ni Mayor Jonas Cortes sa niagi’ng adlaw.
Si Roger Paller, public information officer sa kagamhanan sa dakbayan, niingon nga sukad sa Enero hangtud sa Disyembre sa tuig 2013 mao’y natala ang 453 ka biktima sa dengue.
Dugang ni Paller nga sa tibuok tuig sa 2014, nikunhod usab ang gidaghanon sanglit nahimo na lang kini nga 228. Gitataw ni Paller nga sukad sa Enero hangtud sa katapusang adlaw sa Septiyembre niini’ng tuig 2015, mao’y natala sa CHO ang 65 na lang ka kaso ug gituohan nga madugangan kini og gamay hangtud sa Disyembre.
Matud ni Paller nga daku ang ila’ng pagtuo nga ang pagkunhod sa gidaghanon nagagumikan sa 4 o’clock habit nga pagpanglimpiyo nga gipasiugdahan sa kabarangayan.
Si Paller niingon nga pinaagi sa pagtinabangay sa mga opisyal sa barangay ug mga molupyo sa pagpanglimpiyo sa palibot mao’y hinungdan nga wala usab makapundo ang lamok nga nagdala og sakit nga dengue. (BANAT NEWS)