CEBU, Philippines - May kalapasan ang mga kawani ug opisyal sa kagamhanan sa dakbayan sa Sugbo sa pagpahigayun og rally niadto’ng Miyerkules base sa lagda sa Civil Service Commission.
Sa 1987 Constitution diin nalakip ang Civil Service Resolution 021316 sa Omnibus Rules, gidili sa mga kawani ug opisyal sa gobiyerno ang pagpahigayun ug pagtabang sa concerted mass auctions sama sa strike, rally ug mass leave ilabi na kung oras tingtrabaho.
Gipasabot ni Prolaine Daclan sa CSC-7 nga wala hinuon did-i ang mga empleyado o opisyal nga mopagawas sa ila’ng mga yangungo apan limitado kini sama sa pagsuot og color coding nga sinena, armband ug uban pa.
Siguraduhon nga dili mabalda ang mga transaksiyon sa mga buhatan sa gobiyerno.
Sa nahitabong rally sa pipila ka kawani sa Cebu City Hall alang sa panawagan sa pagpasar sa supplemental budget 1 diin nalakip ang budget alang sa productive enhancement incentive, matud ni Daclan sa pagkakaron dili una sila manginlabot niini.
Gumikan kay base sa resolution, ang pangulo sa ahensiya sa gobiyerno mao’y kinahanglan moresolbar kun adunay mahitabo’ng mass action sa mga kawani ug opisyal.
Apan kun wala’y aksyon ang mayor, ang CSC mohimo og kinaugalingon nga imbestigasyon labi na kung may moduso og reklamo.Kung mapamatud-an nga nakalapas sa resolution pasakaan sila og kaso’ng conduct prejudicial to public interest nga adunay silot nga unom ka buwan ngadto na sa usa ka tuig nga pagkasuspenso.
Samtang gitug-an ni DILG assistant Regional Director Elias Fernandez nga wala’y nahimo’ng kalapasan ang Sangguniang Panlungsod sa wala nila pagpasar sa supplemental budget tungod kay ila’ng trabaho ang pagseguro nga nasubay ang proseso sa pagpagawas sa kwarta sa siyudad. (BANAT NEWS)