Davide-Magpale tandem padayon

CEBU, Philippines - Giklaro ni Gobernador Hilario Davide III nga lig-on ang grupo sa Liberal Party sa probinsiya ug sila gihapon ni Bise Gobernador Agnes Magpale ang magpares sa sunod tuig nga eleksiyon.

Kini nunot sa hungihong nga mobuwag si Magpale ug modagan sa pagka-gobernador o kaha makigpares sa kaatbang ni Davide.

Ang pagduda nitumaw human si Senador Grace Poe ug Senador Chiz Escudero nakigtagbo sa kadagkuan sa Barug Alang sa Kauswagan ug Demokrasya (Bakud) Party diin sakop si Magpale.

Ang bise president sa Bakud, Kongresista Ace Durano, niingon nga wala pa sila’y kandidato sa pagka-presidente bisan sa awhag ni Davide nga pasuportahan si kanhi kalihim Mar Roxas II ubos sa LP.

Matud ni Davide nga kung magkaduol na ang eleksiyon daghan ang intriga nga motumaw ug wala pa’y pormal nga deklarasyon si Durano ug ang Bakud nga si Poe ang ila’ng suportahan.

Matud usab ni Davide nga adunay mga kritiko niya ug sa LP nga siya ug si Magpale buot lang paawayon ug gub-on.

Gibutyag sa gobernador nga karong Domingo ang LP magtagbo diin ihan-ay na nila ang tanan ilabi na ang problema sa ika-unom ug una’ng distrito.

Sa laing bahin, si Bokal Celestino “Tining” Martinez III nga kaalyado sa LP nibutyag nga padayon pa ang paghan-ay sa mga kandidato sa ikaupat nga distrito.

Sa dakbayan sa Bogo, ang iya’ng amahan nga si Mayor Celestino “Junie” Martinez Jr. ang anaa na sa katapusang termino ug ang anak nga si Atty. Carlo Martinez, deputy commissioner sa National Telecommunications Commission (NTC), ang modagan pagka-mayor.

Si Junie giingong modagan pagka-kongresista apan matud ni Tining nga dili pa kini final.

Si Tining usab nibutyag nga si Bokal Joven Mondigo Jr. sa One Cebu Party ang motabok sa LP ug mao’y ila’ng kandidato sa pagka-mayor sa lungsod sa Medellin. (BANAT NEWS)