CEBU, Philippines - Usa ang patay sa kapin sa 30 ka mga natala nga kaso sa dengue sa dakbayan sa Toledo base sa talaan sa City Health Department sulod sa buwan sa Septiyembre ning tuiga.
Si Antonio Layan Jr. ang sanitary inspector sa siyudad miingon nga tinun-an sa day care nga taga barangay Bato ang nakalas. Samtang aduna say natala nga kaso sa barangay Cabitoonan. Ang mga tinugyanan sa panglawas sa siyudad nagsubay karon sa kabarangayan pagpangita sa uban pang biktima sa maong sakit.
Ang siyudad nipahigayon na og fogging sa mga lugar nga adunay mga kaso sa dengue sa tinguha nga patyon ang mga lamok nga nagdala niini ug paglusad og information drive sa mga eskuylahan kabahin niini.
Subling nipahimangno ang city health officials sa katawhan nga batasanon gyud ang paglimpiyo sa ilang palibot.
Sa laing bahin, napulo ka mga karaang public school buildings sa siyudad sa Sugbo ang planong ipa-demolis sa local school board aron di na kini himuong breeding ground sa lamok nga nagdala og dengue.
Si Rady Diola ang pangulo sa Local School Board miingon kinahanglan manglimpyo kanunay sa palibot sa eskuylahan aron way tubig nga mapundo ug maitlogan sa mga lamok.
Samtang giawhag niya ang mga ginikanan mohimo usab sa ilang obligasyon paglimpyo sa ilang palibot alang sa ilang mga anak.
Ang pangulo sa City Health Department Dr. Daisy Villa nipahibalo sa Banat News, ning buwan sa Oktubre walay natala nga kaso sa dengue apan wala sila mokompiyansa ug gihingusgan nila ang kampanya batok sa maong sakit.
Sa laing bahin didto sa Daanbantayan, giklaro ni Rex Novanos, ex-officio sa lungsod nga wa tugoti sa konseho ang sugyot ni Mayor Agosto Corro pagdeklarar og state of calamity tungod sa daghang kaso sa dengue tungod kay wa man kini kinahanglana pa.
Matud pa niya, ilang gitagan-an ang posibleng mas dagkong katalagman nga moabot aron dunay magamit nga pundo ang lungsod.
Sumala pa ni Novanos, paigo na ang pagpalabang sa konseho og resolusyon nga nagtugot kang Corro aron mamalit og lima ka misting machines ug mga tambal batok sa dengue ug anha kuhaon gikan sa calamity fund.
Sumala pa sa Provincial Disaster Risk Reduction Management Office, mas paspas ang pagpalit niining maong mga ekipo kun modeklarar og state of calamity kay di na moagi og bidding ug ipaagi na kini sa emergency purchase. (BANAT NEWS)