CEBU, Philippines – Gisusi sa Provincial Health Office (PHO) ang giingong pagsiaw sa mga langaw sa barangay Langub, lungsod sa Asturias nga giingong gikan sa poultry farm sa lugar.
Ang hepe sa Provincial Health Office (PHO), Dr. Cynthia Genosolango, nagkanayon nga naghuwat pa sila sa pormal nga report gikan sa lungsod aron makakuha usab sila og tukma’ng kasayuran kabahin niini.
Gipasabot ni Genosolango nga dili sila maka-isyu og pormal nga pamahayag kabahin niini hangtud nga dili makadawat ang iya’ng buhatan og pormal nga report.
Matud ni Genosolango nga gawas sa lungsod sa Asturias adunay laing lugar nga ila’ng gisusi nga adunay mga poultry farms.
Usa sa mao’ng mga lugar ang lungsod sa Sibonga diin ang mga hugaw o iti sa manok ipanghatag ngadto sa mga mag-uuma aron masabwag sa kaumahan.
Apan giingong dili dayun makuha ang mga hugaw sa manok ang hinungdan nga manemaho ug dugukon sa langaw.
Usa sa mga sakit tungod sa langaw ang kalibanga.
Dugang ni Genosolango nga aron makalikay sa mga sakit kinahanglan ang kalimpiyo sa palibot. – /GMR) (BANAT NEWS)