CEBU, Philippines – Gidangop sa buhatan sa Commission on Higher Education sa walo ka tinun-an sa Cebu Mary Immaculate College, Inc sa Talamban, dakbayan sa Sugbo ang ila’ng reklamo batok sa tagdumala sa tunghaan.
Pipila kanila mga scholars sa kagamhanan sa dakbayan sa Sugbo.
Ang gireklamo mao si Dr. Montana Phua, dean sa College of Education sa CMIC.
Matud pa nga papaliton og nobela nga libro nga nagkantidad og P500 ang mga tinun-an una makaapil sa ila’ng examination.
Lakip sa ila’ng reklamo nga kinahanglan sila’ng mga scholars mag-maintain sa grado nga 1.5 ug kung dili, pabalhinon sila og lain bisan og sila graduating na.
Matud ni Darla, tinun-an sa 4th year, nga gikan pa sa semi-finals wala siya nakakuha og exams tungod kay wala siya kapalit sa libro nga wala man unta’y labot sa ila’ng curriculum.
Apan ang director sa CHED-7, Dr. Freddie Bernal nga nahinabi sa Banat News suway nga nitawag sa tag-iya sa eskwelahan apan wala gitubag.
Matud ni Bernal nga dili mahimo nga dili pakuhaon og exams ang mga estudyante tungod kay naa sa memorandum sa CHED nga makabayad o dili kinahanglan makakuha gyud sa exams ang mga tinun-an.
Nasuta nga wala'y gi-handle si Phua nga bisan unsa nga subject sa mga tinun-an.
Gisuwayan usab og kuha sa iya’ng habig si Phua apan wala kini sa iya’ng buhatan ug kapila usab kini gibutangan sa telepono sa iya’ng staff.
Si Konsehal Alvin Dizon sa iya’ng bahin, ang pangulo sa committee on education sa konseho sa dakbayan sa Sugbo, nibutyag sa Banat News nga iya’ng giawhag ang mga estudyante nga modangop sa iya’ng buhatan aron iya’ng matun-an ug mapatawag sa usa ka executive session ang nagdumala sa tunghaan aron makahatag sa ila’ng habig.
Sumala pa ni Dizon nga dili makiangayon sa mga estudyante kung sila pugson pagpalit sa libro ug pagbayad sa ubang bayronon. – /GMR) (BANAT NEWS)