Poultry Farms di angay basulon–mayor

CEBU, Philippines - Di pabor ang mayor sa lungsod sa Asturias nga pasirad-an ang mga poultry farms nga gipasanginlan sa mga residente sa barangay Langub nga usa sa mga hinungdan sa pagdagsa sa langaw sa ilang dapit.

Sumala pa ni Mayor Alan Adlawan, nga ang pagdagsa sa langaw “seasonal” ug duna gyuy mga panahon nga modagsa kini sa maong lungsod.

Apan iya nang gipasusi ang maong reklamo ug iyang nasuta nga dili lang ang poultry farm ang mabasol sa pagdaghan sa langaw.

Gani matud pa niya nga nagkaestorya sila kagahapon sa buntag sa tag-iya sa poultry farm aron matubag ang yangungo sa katawhan.

Dugang ni Adlawan nga kay seasonal man ang maong problema mobalik gihapon kini. Sumala pa niya dili makiangayon kun sirad-an ang farm tungod lang sa maong rason.

Iyang nakita nga usa sa mga hinungdan niini ang kawalay pansayan sa ubang mga residente ug matud pa niya nga bisan gitagaan na sila og mga toilet bowls ug kabilya wa sila maghimo og limpyo nga pansayan.

Iya nang gihangyo ang mga tag-iya sa mga poultry farms magbuhat og mga pamaagi aron mamenosan ang pagdagsa sa langaw.

Sa unang pagkasugat sa maong problema gipahunong sa mayor ang pag-deliver sa mga bag-ong manok hangtod nga dili pa nila makita ang solusyon.

Niadtong miaging bulan ang tag-iya sa poultry mihatag na’g fly trap sa mga taga Langub ug human niadto na-obserbahan nga migamay na ang langaw.

Apan sa barangay Agtugop mas daghang langaw ang midagsa sa maong lugar ug nahasol na ang mga molupyo. – /EIM) (BANAT NEWS)