Chiong kampante vs kiha kaniya

CEBU, Philippines – Kampante si Mayor Valdemar Chiong sa siyudad sa Naga nga mabasura ang kasong gipasaka batok kaniya niadtong milabay’ng semana didto sa buhatan sa Ombudsman-Visayas.

Matud pa ni Chiong nga ang ilang pagpagawas og kwarta nga gihatag sa Comelec may igong dokumento nga nagsuporta sa ilang lihok.

Sigun pa niya nga anaa sa ilang 2013 annual budget ang kantidad nga ilang gihatag sa Comelec aron kini makatabang sa galastuhan sa eleksyon ug gani kining tanan liquidated.

Si Chiong nagkanayon natubag na nila ni Atty. Charisse Faith Sojor sa Comelec ang  COA nga naa sa Artikulo 10 sa Omnibus Election Code section 50 nag-ingon nga: “local governments are mandated to share in the expenses of the election for local elective officials through appropriation of funds for the purpose.”

"Nagtuo ko nga ang tanang LGU naghimo niini kay lisud man sa Comelec kun asa sila i-sweldo sa mga BEI(board of election inspectors), mga tawo nila nga naglihok 24 oras, mga pagkaon, gasolina ug uban pa nilang galastuhan," matud pa ni Chiong.

Ang konseho sa Naga ang niaprubar sa ilang 2013 annual budget niadtong 2012 lakip na ang paghatag og budget para sa Comelec nga magamit nila sa election. Ang nipasaka og kaso mao ang duha ka kanhi kapitan nga adunay laraw nga modagan pagkakonsehal sa siyudad ug ang usa mao ang igsuon sa ilang konsehal nga nagtinguha nga magpapili pagkamayor sa sunod tuig nga eleksyon.

Matud pa ni Chiong nga “luma na” ug politically motivated ang pagpasaka kaniya og kaso, sumala pa ni Chiong gusto lang mosikat ug aron makakuha og media mileage ang nikiha kaniya. – /EIM) (BANAT NEWS)