Hinabang sa El Niño padayon

CEBU, Philippines – Padayon ang pagpanghatag og ayuda sa Kapitolyo ngadto sa mga mananagat ug mag-uuma sa kalungsuran nunot sa nagpadayong El Niño.

Sukad niadtong Hunyo, ang Kapitolyo nakapangapud-apod na og relief packs ngadto sa 293 ka barangay sa 18 ka lungsod nga naapektuhan sa El Niño. Si Bokal Peter John Calderon nagkanayon nga bisan og nasinati ang pag-uwan-uwan, ang mga mag-uuma dili angayan nga mokompiyansa.

Base sa report sa PAGASA nga ang huwaw padayon hangtud sa una’ng quarter sunod tuig.

Sa nilabay’ng buwan, 2,000 ka mag-uuma sa siyam ka barangay sa lungsod sa Ginatilan ang nakadawat og relief packs nga adunay sulod nga bugas, de lata ug noodles.

Gawas niini ang ubang mga estudyante sa elementarya sa lungsod nga mga anak sa mag-uuma ang gipanghatagan usab og mga school supplies.

Ang mga mag-uuma sa nahisgutang lungsod gihatagan usab og 650 ka sachets nga liso sa mga utanon sa Provincial Agriculture Office.

Gawas niini, ang mga mag-uuma sa barangay Anao, Salamanca ug Cambagte nga naapektuhan sa bagyo’ng Queenie ug Seniang sa nilabay’ng tuig ang gipanghatagan usab og mga liso sa utanon.

Ang matag mag-uuma sa barangay sa lungsod nakadawat usab og lima ka bag sa open-pollinated nga klase sa lugas sa mais.

Gawas sa relief packs, ang Kapitolyo nanghatag usab og mga plastic drums nga mapundohan og tubig sa mga mag-uuma sa kalungsuran. – /GMR) (BANAT NEWS)