Mayor Chiong moretiro na

CEBU, Philippines – Gipahibawo ni Mayor Valdemar Chiong sa siyudad sa Naga nga sa pagtapos sa iyang termino pagkamayor mopahuway na sa politika.

Si Mayor Chiong ang nagserbisyo na sa iyang ikatulo nga termino isip mayor sa siyudad. Sa pangutana kun kini modagan ba siya pagka board member o ba kaha kongresista, iya lang kining gikataw-an ug miingon nga mopahimulos lang una siya sa higayon nga isip usa ka sibilyan.

Hinuon wa gilimod ni Chiong nga ang iyang anak nga si Atty. Kristine Chiong ang gituboy sa ilang grupo aron mohulip kaniya samtang ang iyang igsuong incumbent city councilor nga si Othelo Chiong ang bise mayor niini sa sunod tuig nga piniliay. Apan kun mobalibad ang maguwang sa mayor nga modagan pagkabise mayor mao ra’sab kini ang makapapugos niya nga magpadayon sa politika. Si Othelo Chiong ang gikaingong adunay gipamati sa lawas.

"Kun dili modagan ang akong igsuon aw mao nay giingon nga dili sa ko makapahuway sa politika. Pero kung ma-dialysis na siya moabtik man," asoy pa sa mayor sa Banat News.

Nasayran nga si Vince del Mar ang numero unong konsehal sa Naga ang makig-atbang ni Atty. Chiong karong umaabot nga piniliay.

Matud pa ni Chiong nga salig siya sa katakos sa iyang anak sa natad sa pagpadagan sa siyudad tungod kay gawas nga kini abogada, suhito kini sa iyang opisina kay nagserbisyo man kini sa iyang administrasyon isip consultant ug uban pang mga trabaho sa iyang buhatan.

Dugang pa ni Chiong nga iya sab nga gikonsulta ang mga kapitan ug konsehales ug mipadayag sila og suporta sa iyang anak. – /EIM) (BANAT NEWS)