Pagpausbaw sa COLA sa mga magtutudlo gisupak

CEBU, Philippines – Napakyas ang tinguha ni Konsehal Emmarie “Lolypop” Ouano-Dizon nga pausbawan unta ang Cost of Living Allowance (COLA) sa mga magtutudlo sa publiko nga tunghaan sa Mandaue.

Gusto unta nila ni Konsehal Dizon ug Konsehal Bethoveen Andaya nga ang kasamtangan nga P700 nga binuwan nga COLA sa mga magtutudlo himuon na nga P1,000.

Ang mga magtutudlo sa publikong tunghaan sa Mandaue nangandoy unta nga P1,200 ang binuwan nila nga COLA gikan sa kagamhanan sa Mandaue, apan nagduda si Konsehal Dizon nga dili kini uyonan sa iyang mga kauban.

Giduso ni Konsehal Ouano ang sugyot nga himoon lang P1,000 ang binuwan nga COLA sa mga matag magtutudlo sa Mandaue, apan gisupak gihapon kini sa kinabag-ang konsehal.

Diha nga gisukna ang mga konsehal kun uyon ba sila sa sugyot ni Konsehal Dizon, si Konsehal Benjamin Basiga ra maoy bugtong miisa sa iyang kamot ug misuporta sa resolusyon.

Nasagmuyo kaayo si Konsehal Dizon kay nasuta niya nga kadaghanan sa iyang mga kauban wala’y pagpakabana sa kahimtang sa mga magtutudlo.

Si Annabelle dela Cerna, ang bise presidente sa Dignity Teachers Coalition, nakigtagbo ni Konsehal Dizon aron matabangan sila nga madugangan ang ilang binuwan nga COLA.

Ang COLA sa mga magtutudlo sa dakbayan sa Lapu-Lapu ug dakbayan sa Sugbo nagdawat og P1,500 nga COLA gikan sa tagsa-tagsa nila ka dakbayan.

Gipasabot ni Konsehal Dizon nga ang P300 nga usbaw sa binuwan nga COLA sa mga magtutudlo gamay ra g’yud unta kaayo nga kantidad. – /RUB) (BANAT NEWS)