CEBU, Philippines – Mihangyo ang Police Regional Office-7 sa ubang law enforcement agencies nga mopahibalo sa lokal nga kapulisan kung aduna silay pagabuhatong operasyon sa usa ka lugar aron malikayan ang “misencounters.”
Kini human ang National Bureau of Investigation sa Manila milusad og lima ka operasyon sulod sa usa ka adlaw batok sa mga notadong drug pushers sa Bohol niadtong miaging Martes.
Nasakmit sa maong operasyon ang P5.3 milyones nga gidudahang shabu ug 13 ka tawo ang nadakpan.
Si Senior Superintendent Rey Lyndon Lawas, nipasalamat sa ubang mga law enforcement agencies kay nitabang sila sa kampanya kontra ilegal nga drugas kay di man nila mahimo nga sila rang tanan.
Apan matud niya nga mas maayo kung gipahibawo sa NBI ang Bohol Provincial Police Office aron sa ingon makatabang sila kun dunay dautang mahitabo.
Gipatawag ni Lawas si Senior Superintendent Dennis Agustin, ang hepe sa BPPO, ug gipangutana kun duna bay koordinasyon kanila ang operasyon sa NBI.
Apan gikatahong ang gobernador maoy mipahibalo niini nga nagpatabang sa pag-kostudiya sa mga dinakpan.
Sigon ni Lawas nga sa polisiya sa kapulisan, tanang ahensiya sa gobiyerno nga magbuhat og operasyon kinahanglang mo-coordinate sa local police stations aron matala sa ilang record.
Si Lawas nagtinguha nga makaestorya ang kadagkoan sa NBI kabahin sa isyu sa “koordinasyon.”
Matud niya wa nila kinahanglana ang mga detalye sa operasyon basta makahibalo lang sila aron duna silay matabang kun magkinaunsa.
“At least lang, we can inform the concerned police station nga naa’y operation anang lugara, baka mayroong putokan so they know na the drill,” sigon ni Lawas kinsa miingon nga nahitabo na kaniadto nga nagkaunay ang managlahing law enforcement units tungod kay wala mopahibalo ang usa.
Samtang ang NBI-7 assistant director Augusto Eric Isidoro miingon nga dili sila kinahanglan nga mokoordinar sa kapulisan aron paglikay sa leak sa impormasyon.
“Ang purpose lang nyan (coordination) is courtesy and to avoid misencounter. Pero kung ma-jeopardize lang ang operation and since drugs ‘yung operation, hindi mandatory,” matud pa niya.
Matud ni Isidoro nga dunay koordinasyon ang ilang operasyon sa Philippine Drug Enforcement Agency-7 nga mao’y lead agency sa kampanya kontra sa illegal drugs. – /EIM) (BANAT NEWS)