Uwan di una ipakaligo

CEBU, Philippines - Nipahimangno ang Cebu City Disaster Risk Reduction Management Office sa dili una pagpasinguwan.

Kini samtang gisusi pa sa Environmental Management Bureau-7 pinaagi sa mobile air quality monitoring ang gabon nga nasinati sa Metro Cebu. Matud sa pangulo sa CDRRMO, Konsehal Dave Tumulak, nga posible’ng adunay acid rain bisan wala pa’y resulta ang pakisusi.

Matud sa tigpamaba sa Department of Environment and Natural Resources-7, Eddie Llamedo, nga ang bukirang bahin sa siyudad sa Sugbo lakip na ang downtown area ang gikuhaan nila og air quality sampling aron masuta ang kalidad niini.

Dugang ni Llamedo nga dili angay mabalaka ang publiko tungod kay luwas gihapon ang hangin sa Metro Cebu.

Si EMB-7 Director, Engr. William Cañado, niingon nga dili nila malambigit ang gabon sa nahitabo’ng forest fire sa Sumatra, Indonesia.

Ang kondisyon sa panahon ug ang Low Pressure Area (LPA) ang usa sa gitan-aw nga hinungdan ngano’ng adunay gabon ang Sugbo.

Nagkanayon si Engr. Oscar Tabada, pangulo sa PAGASA-Visayas nga kinahanglan pa nila susihon sa Singapore kun haze ba gikan sa Sumatra ang nasinati sa Sugbo. (Decemay P. Padilla/GMR)(BANAT NEWS)