CEBU, Philippines - Nakabsan sa kinabuhi sulod sa tambalanan ang 38-anyos nga lalaki human pusila sa iya’ng silingan atol sa ila’ng panaglalis sa sitio Kangitngit, Tisa, dakbayan sa Sugbo pasado alas 10 sa nakalabay nga buntag.
Ang biktima mao si Jaime Natividad samtang ang suspek mao si Melicio Sabejon, hingkod.
Matud ni Senior Police Officer 2 Rommel Bancog, imbestigador sa homicide section sa Cebu City Police Office, nga nahinabi sa Banat News nga niadto pa’ng nanglabay nga adlaw nagkalalis ang duha sa wala masayri nga hinungdan.
Apan niadto’ng nakalabay nga adlaw naabot sa gipuy-an sa suspek ang biktima ug subli na sab nga naglalis sigun pa sa mga nakakita.
Tunga-tunga sa ila’ng tinubagay gibunot sa suspek ang dala niini nga revolver nga iya’ng gigamit sa pagpusil igo sa tiyan sa biktima.
Human sa pagpamusil dali sab nga nisibat sa lugar si Sabejon samtang gidala sab sa Cebu City Medical Center si Natividad apan pipila ka oras ang nilabay nakabsan gyud sa iya’ng kinabuhi.
Si Bancog niingon nga si Sabejon nadakpan na kaniadto human nakuhaan og video karera.
Kaso’ng murder ang gipasaka sa kapolisan batok sa suspek kinsa gipangita pa sa kapolisan. (Jojo C. Ugdol/GMR)(BANAT NEWS)