City treasurer gilabay sa merkado

CEBU, Philippines - Naghilak nga niatubang sa mga tigbalita si Talisay City Treasurer Emma Macuto human siya gibalhin ni Mayor Johnny V. de los Reyes sa merkado.

Si Macuto nakadawat sa Executive Order ni JVR niadto’ng Septiyembre 29 ug epektibo ang iya’ng pagkarelibo niadto’ng Miyerkules.

Si Macuto nga nag-seminar sa Bureau of Local Government Finance niadto’ng higayuna ang nahingangha sa kalit nga kamanduan nga giingong gibase sa rekomendasyon sa Commission on Audit.

Gipangutana ni Macuto ang ila’ng regional director sa BLGF nga si Hermigilda Garcia ug nakadawat siya og tubag pabor kaniya sanglit ang mao’ng buhatan lang ang makapuli ug makapapahawa sa usa ka treasurer sa lokal nga kagamhanan base sa lagda sa balaud.

Matud ni Macuto nga nakadungog na siya nga siya relibuhan ug babagan ug dili pasudlon sa City Hall kung kini mangahas.

Apan kagahapon si Macuto ang nipatim-aw sa iya’ng buhatan ug wala’y bisan usa ang nibabag.

Asoy niya nga isip respetar sa mando sa mayor, mo-report siya sa merkado apan nagdumili una siya sa pagpirma sa bisan unsa’ng tseke samtang siya naghuwat sa legal nga tambag sa iya’ng abogado.

"Isip respetar sa mayor ako mo-report gyud ko sa merkado. Ambot og unsa’y sala nako niya," matud ni Macuto.

Usa sa maapektahan sa dili una niya pagpirma sa tseke mao ang sweldo sa Liga ng mga Barangay ug remittance nila sa Bureau of Internal Revenue.

"Dili ko katuo ani kay buotan baya ang mayor pero mura’g naa sa iya’ng palibot ang nagsulsol," matud ni Macuto.

Daku niya’ng pagtuo nga politika ang hinungdan tungod kay wala siya’y bisan usa nga mahinumduman nga sala o nagpabaya siya sa iya’ng trabaho.

Siya nagkanayon nga bisan pa og loyal siya ni kanhi kongresista Eduardo Gullas panahon nga kini na mayor, nisaad siya ni JVR nga magtarung ug kini tabangan ang iya’ng administrasyon.

"30 na ka tuig ko sa serbisyo pero karon ra ko nakasugat og ingon ini nga sitwasyon. Ang nakasakit kay nagtinarung ka sa imo’ng trabaho apan wala ni nila makita," asoy ni Macuto nga nipatulo sa iya’ng luha.

Ang gihulip ni Macuto mao si Dalisay Gabriel.

Samtang si JVR nagkanayon nga iya una’ng gipabalhin si Macuto sa merkado tungod kay padayun pa ang imbestigasyon sa COA bisan nasayud siya sa balaud sa BLGF.

Apan si Bise Mayor Romeo Villarante nagkanayon nga ilegal ang gibuhat sa mayor.

Gani iya’ng giawhag si Macuto nga mopasaka og kaso batok sa mayor sa Ombudsman o sa Civil Service Commission tungod kay iya’ng gihulagway nga usa kini ka matang sa constructive dismissal.

Matud niya nga naghimo na sab og kaguliyang ang mayor sa siyudad ug ang konseho na sab ang iya’ng pasanginlan.  (BANAT NEWS)