IT Park trapik karong gabii

CEBU, Philippines - Giawhag sa Cebu City Transportation Office ang mga motorista nga mangita og laing rota gawas sa IT Park ug Salinas Drive karong gabii tungod sa duha ka dagku’ng kalihukan.

Matud ni CCTO operations head Jonathan “Joy” Tumulak nga gipaabot ang grabe nga trapiko tungod sa dungan nga dagku nga kalihukan sa IT Park sama sa pagselebrar sa Octoberfest ug usa ka concert.

Tug-an ni Tumulak nga wala’y re-routing nga mahitabo tungod kay wala na’y lain nga maagian ang mga sakyanan.

Hinuon adunay 50 ka personnel sa CCTO ang ibutang sa gawas ug sa sulod sa IT Park.

Matud ni CITP property manager Lydito Peliño II nga magpabilin gihapon ang ila’ng naandan nga set up sa pagpatuman sa seguridad ug trapiko sulod sa IT Park. Magsugod ang kalihukan sa alas 5 sa hapon ug mahuman kini sa alas 2 sa kadlawon.  (BANAT NEWS)