Pataka’g labay og upos priso
CEBU, Philippines - Natanggong ang usa ka lalaki sa Carbon Police Station tungod sa pagpataka og labay sa upos sa sigarilyo sa barangay Ermita, dakbayan sa Sugbo.
Giila ang lalaki nga si Carlos Gimpaya, taga barangay Kalubihan, kinsa gi-isyuhan og warrant of arrest ni Judge Oscar Andrino.
Matud sa pangulo sa Cebu Environmental Sanitation and Enforcement Team (CESET), Grace Luardo, kalapasan sa Seksiyon 9 sa City Ordinance 1361 nga nagdili sa paglabay og basura apil ang upos sa sigarilyo ug uban pa sa mga publiko nga dapit ang nahimo sa dinakpan.
Gi-isyuhan si Gimpaya og citation niadto’ng Hulyo 4, 2014 apan wala motunga ug nibayad sa buhatan sa CESET hinungdan nga ang kaso naabot sa korte human gibaliwala usab ang duha ka subpoena batok kaniya.
Tug-an ni Luardo nga mao pa lang kini ang una’ng higayun nga adunay natanggong sa prisohan tungod sa pagbaliwala sa ordinansa sa pagdili og pagpataka’g labay sa basura.
Piyansa nga P1,000 ug sama’ng kantidad nga multa ang bayranan ni Gimpaya sa mao’ng kalapasan. (BANAT NEWS)
- Latest
