CEBU, Philippines - Nagtingkagol sa selda sa Dumanjug Police ang usa ka babayeng kanhi kagawad sa barangay human nadakpan sa mga sakop sa Dumanjug Police Station kauban ang iyang kalive-in partner atol sa buy-bust operation sa barangay Masa.
Ang mga dinakpan mao sila si Vicenta Pepito, 40, kanhi konsehal sa maong barangay ug Jason Entrina, 30, nagpuyo sa maong dapit.
Matud pa ni Police Officer 1 Carlito Zulueta ang desk officer sa Dumanjug Police nga nahinabi sa Banat News, dugay na nilang gipanid-an ang ilegal nga kalihokan sa duha.
Gamit ang P200 nga marked money nakapalit ang asset sa kapulisan og shabu gikan sa mga suspetsado hinungdan nga sila gisikop. Nakuha gikan sa duha ang tulo ka gagmay nga pakete ug usa ka medium size pack nga gituohang shabu ug P2, 680 nga gituohang kinitaan sa drugas.
Samtang sa lungsod sa Dalaguete, nadakpan sa sitio Private, barangay Mantalungon pinasikad sa search warrant nga gi-isyu ni RTC Judge Maximo Perez si Maximo Belia, alyas Bardi.
Nakuhaan siya og 90 ka gagmay nga paketeng gituohang shabu nga mokantidad og P42, 480 ug usa ka 38 revolver nga dunay unom ka mga bala.
Sa laing bahin, usa ka call center agent ang gidakop human adunay natagak nga usa ka paketeng shabu gikan kaniya samtang nagkuha unta og police clearance diha sa Talisay City Police Station. Daling gidakop si Jun Carlo Alfreda, 26, taga sitio Laray, barangay San Roque, sa maong dakbayan sa Talisay.
Si Police Officer 3 Oliver Ortega nakabantay nga adunay gipunit si Alfreda ug nasuta nga usa kini ka paketeng shabu maong dali niya kining gikuptan. Apan si Alfreda dihang nakahinabi sa Banat News kusganong mihimakak nga iya ang maong drugas. (BANAT NEWS)