CEBU, Philippines – Subling giandaman sa local ug national organizing committees sa Asia-Pacific Economic Cooperation (APEC) Meetings ang laing hugna sa ministerial meetings karong Oktubre.
Si Ambassador Ma. Angelina Sta. Catalina sa NOC nagkanayon nga sa Oktubre 8-10 ipahigayun ang transportation ministerial meeting ug sa Oktubre 12-14 ipahigayun ang energy ministerial meeting.
Kagahapon ang organizing committees nisuroy sa Kapitolyo aron makita nila ang palibot tungod kay ang kagamhanan sa probinsiya mo-host sa welcome dinner alang sa energy ministerial meeting.
Samtang ang dakbayan sa Sugbo gikatakda’ng mao’y mo-host sa welcome dinner alang sa transportation ministerial meeting.
Matud ni Sta. Catalina nga ang Kapitolyo usa ka historical nga lugar ug buot sa NOC nga ma-promote tungod kay mga destination usab kini alang sa investment.
Ang mga host agencies mao ang Department of Transportation and Communication (DOTC), Department of Energy (DOE) ug ang mga lokal nga kagamhanan nga mao’y modeterminar sa mga schedules sa welcome dinner.
Dugang ni Sta. Catalina nga 87 ka senior officials meeting sa lima ka venue ang napahigayun na sa Sugbo sulod sa 21 ka adlaw nga nagsugod niadto’ng Agosto 22, 2015. – /GMR) (BANAT NEWS)