Polis nanghulga og bata

CEBU, Philippines – Paimbestigaran sa hepe sa Cebu Provincial Police Office ang usa ka polis nga gipasanginlang nanghulga og minor de edad diha sa sitio Kalumpang, barangay Poblacion West lungsod sa Moalboal sa nakalabay nga gabii.

Si Sr. Supt. Noel Gillamac ang direktor sa kapulisan sa CPPO mimando ni Supt. Brindo Nacario ang hepe sa Provincial Investigation and Detective Management Branch (PIDMB) imbestigahon ang reklamo batok kang Police Officer 3 Victor Avenido.

Si Avenido nadestino sa Daanbantayan apan nagpuyo sa barangay Basdiot sa Barili.

Matud pa usa ka 15-anyos nga residente sa maong dapit ang mireklamo batok ni Avenido sumala pa ni Police Officer 3  Stewart Bayang, imbestigador sa Moalboal Police.

Si Bayang nga nahinabi sa Banat News mibutyag nga nahitabo kini samtang sakay sa motorsiklo paingon unta mag-vigil ang 15 anyos dihang kalit kini nga giatangan ug gibabagan sa dalan ni Avenido.

Sumala pa ni Bayang nga human mihunong ang motorsiklo nga gisakyan sa 15 anyos gihawiran sa polis ang manobela ug giingnan ang batan-on og “pusilon tika karon.”

Gumikan sa kahadlok kay nagtakin man og pistola ang maong polis nga nakasibilyan misinggit pagpangayo og tabang ang bata. Sa dihang migawas ang iyaan sa biktima milakaw dayon si Avenido nga nagsusapinday sa dalan.

Kagahapong adlawa ang mga sakop sa Women’s and Children Protection Desk (WCPD) sa Moalboal Police nagplano pagkombinsir sa 15 anyos pagpasaka og pormal nga kaso batok sa maong polis.

Kasong pagpanghulga nga duna’y kalambigitan sa child abuse ang posibling atubangon nga kasong kriminal ni Avenido dugang ang kasong administraba. – /EIM) (BANAT NEWS)