CEBU, Philippines – Kombinsido na si Lapu-Lapu City Mayor Paz Radaza nga hingpit nang gisirad-an ang kaso sa pagpatay kang Karen Kaye Montebon kini base sa gihimong imbestigasyon sa kapolisan.
Ang maong pamahayag maoy tubag ni Radaza kabahin sa panawagan sa grupong Crusade Against Violence (CAV) nga ablihan pagbalik ang kaso aron masusi og maayo ang kalambigitan sa kapuyo sa suspek.
Si Montebon gipatay sulod sa iyang lawak sa Corinthians Subdivision, sa dakbayan sa Lapu-Lapu niadtong Septiyembre 15 adlaw'ng Martes.
Alang kang Radaza human nga napalgang patay ang gitumbok nga mamumuno ni Montebon nga si Ruben Fernandez didto sa Isla sa Nasingin, Lungsod sa Getafe sa Probinsiya sa Bohol, sirado na ang maong kaso human ang mismong mga imbestigador nihimo og makuting pag-analisar sa mga nakuha nilang testimonya ug ebidensya.
Nasayran nga usa sa giingong mihatag og mga impormasyon sa kapolisan nga niresulta sa pag-ila sa suspek mao ang kapuyo niini nga si Jenalyn Soon nga suod nga higala sa pamilyang Montebon. Ang kapulisan nakadawat og mga pagsaway gikan sa Commission on Human Rights (CHR) ug sa CAV human nga mideklarar sila nga “case closed‘’ na ang maong kaso.
Si Thelma Chiong, chairperson sa CAV mikwestyon sa wala paglambigit sa kapulisan kang Soon.
Ang hepe sa kapulisan sa dakbayan sa Lapu-Lapu nga si Senior Superintendent Armando Radoc, miingon dili nila mahimong buksan pagbalik ang kaso hangtod nga wala sila’y makuha nga bag-ong ebidensiya. – /EIM) (BANAT NEWS)