Duha ka guwardiya nanulis

CEBU, Philippines – Gidakop ang duha ka kanhi guwardiya human gipasanginlan nga niunay og tulis sa cashier sa ila’ng kanhi gitrabahoan nga hotel MJ Cuenco, Mabolo, dakbayan sa Sugbo pasado alas 11 sa nakalabay nga buntag.

Ang duha ka suspek mao sila si Liskie John Tejamo, 21, taga La Libertad, Negros Oriental, ug Bernie Paiste, 24, taga Roxas, Zamboanga del Norte, kinsa mga sakop sa Dragon Heart Security Agency.

Samtang ang reklamante mao si Dante Ibay, 25, representante sa Cebu Budget Hotel.

Matud ni Senior Police Officer 1 Daniel Cenidoza, desk officer sa Mabolo Police Station, nga nadakpan ang duha sa Cebu South Bus Terminal diha’ng nasundan sa mga polis human gialarma.

Sumala pa ni Cenidoza nga nadala sa duha ka guwardiya ang duha ka cellphones nga kantidad og kapin P30 mil ug salapi’ng cash nga kantidad og P9,500.

Ang duha ka guwardiya ang kanhi nadestino sa mao’ng hotel apan gipangtaktak sa wala sab masayri nga hinungdan.

Niadtong nakalabay nga adlaw sila namalik ug nihimo sa krimen.

Atol sa pagkasikop sa duha narekober sa kapolisan gikan ni Tejamo ang usa ka .38 revolver nga iya’ng service firearm.

Karong adlawa ipasaka sa kapolisan ang kaso’ng robbery batok sa duha nga kasamtangang gibalhog sa selda sa Mabolo Police Station. – /GMR) (BANAT NEWS)