CEBU, Philippines - Naangol ang usa ka tawo nga mao’y natigbasan diha’ng iya’ng giuwang ang nag-away nga amahan ug anak nga silingan sa sitio Quirino South, Tabunok, lungsod sa Tabuelan alas 8 pasado sa niagi’ng Huwebes sa gabii.
Si Police Officer 1 John Mark Asendiate sa Tabuelan Police Station niila sa biktima nga si Emiliano Intig Jr., 49, ug ang nakatigbas mao si Victor Balsa, 40-anyos.
Matud ni Asendiate nga si Balsa ang nakig-inom sa iya’ng anak-anak nga lalaki nga giila’ng alyas Pawpaw apan diha’ng nangahubog, kalit lang naglalis hangtud nga nagsinumbagay. Si Intig nga nakakita sa duha nga nagsinumbagay dali kini nga niduol ug giukang ang duha apan gikasuko ni Balsa hinungdan nga nikuha kini og sundang ug gitigbas ang biktima.
Nagkabuang sa pagpanagang sa iya’ng bukton ang biktima hinungdan sa mga samad sa iya’ng bukton, liog ug uban ug nalandig sa tambalanan.
Ang suspek nadakpan sa kapolisan nga niresponde.