CEBU, Philippines – Gipaabot nga dili matapos ning buwan sa Septiyembre ma-deport na ang 43 ka mga Taiwanese nga nadakpan sa kapolisan dinhi sa Sugbo tungod sa paghimo og online extortion ug namiktima sa ilang mga kababayan ug sa China.
Alas 5 sa buntag kagahapon, gikan sa PRO-7 ang 43 ka mga Taiwanese gihatud na ngadto sa Mactan Cebu International Airport ug sakay sila sa Philippine Airlines paingon sa Clark, Pampanga.
Matud ni Superintendent Rex Derilo, Acting Chief sa Regional Intelligence Division (RID)-7 ang maong dinakpan temporaryong ipahiluna sa Bureau of Immigration Academy sa Clark Pampanga aron ipa-deport balik sa Taiwan.
Nasayran ang kaso batok sa maong Taiwanese nga gisang-at unta dinhi wa na ihinayon gumikan kay dili sila mahimong ipa-deport kun duna silay pending nga kaso ug kadaghanan sa ilang mga nabiktima taga mainland China ug Taiwan.
Samtang, ang mga 25 ka mga Chinese nationals nagpabilin dinhi sa Sugbo tungod kay nagpadayon ang ilang kaso ug wala gibakwi nga gipaabot nga mapasaka ngadto sa korte apan mag-agad gihapon sila sa Chinese Consulate ug posibleng ipa-deport usab sila balik sa China.
Ang grupo gidakop niadtong Septiyembre 7 human gireklamo sa Taiwan Economic Cultural Office(TECO) gumikan sa online extortion. – /EIM) (BANAT NEWS)