Mga polis gipahinumdoman nga mosimba

CEBU, Philippines - Nagpadayon karon ang pagsuroy sa pari sa kapolisan nga si Father Roland Castillo diha sa mga police stations sa rehiyon-7 aron sa pagpahigayon og Santos nga Misa aron ampoan ang kapolisan ug malamdagan sa Maayong Balita.

Bitbit sa iyang bag nga adunay sulod nga imahe ni St. Michael Archangel mipahinumdum si Castillo kinsa nagranggo usab sa kapolisan og Superintendent, sa iyang mga kaubanang polis  sa paghinulsol sa mga sala ug ang hugot nga pagsalig sa Diyos.

Matud pa ni Castillo sa Banat News nga gituyo niya ang maong transformation program sa PNP alang sa paggiya sa mga pulis sa ilang tagsa ka mga trabaho ug obligasyon ngadto sa katawhan pagpatunhay sa kahapsay ug kalinaw.

Asoy pa ni Castillo nga dili ikalilong nga adunay mga badlungong sakop sa ilang pundok apan wala siya kawagtangi og paglaom nga mausab ra siya sa kadugayan.

Ang hepe sa Minglanilla Police Station nga si Chief Insp. Richard Gadingan nalipay sa maong programa sa PNP tungod kay giangkon niyang tungod sa kadaghan sa ilang gimbuhaton nataligam-an na nila ang obligasyon ngadto sa Kahitas-an.   (BANAT NEWS)