CEBU, Philippines - Giawhag sa hunta probinsiyal sa Sugbo ang National Telecommunications Commission sa paghimo og lakang alang sa kasulbaran sa problema sa hinay nga access sa internet sa nasud.
Sila si Bokal Arleigh Sitoy ug Celestino Martinez III sa ila’ng resolusyon nagkanayon nga ang internet nahimo na’ng panginahanglan sa moderno’ng panahon ug gigamit na sa pagkonektar sa tibuok kalibutan.
Matud sa mao’ng mga opisyal nga daghan kaayo ang reklamo kabahin sa kahinay sa internet access sa nasud.
Gikataho nga sa 22 ka nasud sa South East Asia, ang Pilipinas ika-21 sa connection speed sa internet o duna lang kini 3.64 Mbps itandi sa Singapore nga nag-una nga may 122.43 Mbps.
Ang kahinay sa internet access usa sa inadlaw nga frustration sa matag Pilipino kinsa buot madali ang ila’ng online transaction o magpadala og importante’ng mensahe pinaagi sa email ug uban pa’ng internet access mail. Matud sa mga opisyal nga ang problema angayang hatagan og pagtagad sa NTC. (BANAT NEWS)