Kinsay hatagan sa P500 mil?

CEBU, Philippines - Tun-an pa sa kagamhanan sa dakbayan sa Lapu-Lapu kung kinsa ang angay nga makadawat sa P500,000 nga ganti nga maoy hinungdan natultolan sa kapolisan ang gitagoan sa mamumuno sa 17-anyos nga si Karen Kaye Montebon didto sa Getafe, Bohol.

Matud ni Mayor Paz Radaza, mohimo sila og usa ka komitiba aron pag-screen sa mga impormante nga mitabang sa polis sa pagsulbad sa robbery-slay case ni Montebon.

"I am mandated to protect the people's money, and I have to make sure that whoever gets the reward, deserves it," pasabot pa ni Radaza.

Gimando ni Radaza si City Attorney Yuri Beluan aron mangulo sa maong komitiba.

“I will not hesitate not giving the reward if there is none that is eligible to get the reward,” dugang sa mayor.

Si Beluan nagkanayon nga  usa sa sakop sa komitiba si Senior Superintendent Armando Radoc, acting police chief sa Lapu-Lapu City Police Office ug uban pang opisyal.

Dugang ni Beluan, ilaha pang paabuton ang full report ni Radoc bahin sa kaso ni Montebon.

Killer di makadawat

Bisan si  Radoc nagkanayon nga dili siya makatumbok kun si kinsa gyud ang tagaan sa reward.  Apan giklaro niyang daan nga kun ugaling ang mismong nipatay kang Ruben Fernandez ang motumaw aron pag-claim sa ganti, dili kini mahimo.

"Dili siya makadawat kay iyaha man pud gi-murder si Fernandez. Dakpon ‘nuon siya tungod sa krimen," dugang ni Radoc kagahapon.

Apil nga susihon sa committee mao ang live-in partner ni Fernandez nga si Jenalyn Soon, 23, kun angay ba kining modawat sa maong reward.

Samtang si Senior Superintendent Rey Lyndon Lawas ang pangulo sa Special Investigation Task Group Montebon sa Police Regional Office-7 mibutyag nga adunay dul-an sa 15 ka tawo ang mihatag sa ilahang affidavit nga apil sa ilang subayon kun unsa ka bug-at ang ilang partisipasyon pagpangita sa mamumuno.

Si Fernandez napalgang patay sa taytayan sa isla sa barangay Nasingin, sa Getafe, Bohol human kini gipusil sa wala mailhing tawo sa miaging Martes sa hapon, nahitabo kini pipila ka minutos una pa nakaabot ang tracker team sa LCPO nga nangita kaniya.

Gipakita usab ni Radoc ang usa ka hulagway sa patay’ng lawas ni Fernandez nga nagsul-ob pa sa relo ni Montebon nga lakip sa nahanaw atol sa pagpatay sa dalagita diha sa ilang balay sa Corinthians Subdivision, sitio Suba-Masulog, barangay Basak sa dakbayan sa Lapu-Lapu.

Kapuyo ipakiha

Apan ang pangulo sa Crusade Against Violence Thelma Chiong gusto nga mohimo og re-investigation sa maong kaso bisan gikonsiderar kini sa kapolisan nga sirado na human gipatay si Fernandez ug nakombinsir ang kapolisan nga mao gyud kini ang nagpatay sa tinun-an.

Sa pagkakaron, gipakawalay sala sa kapolisan ang kapuyo ni Fernandez nga si Jenalyn tungod kay way nakitang basehan aron kini kasohan tungod kay aduna silay mga nakitang sirkumstansya nga imposibleng maglambigit sa babaye ngadto sa krimen nga gihimo sa iyang kapuyo.

Apan si Chiong dako og pagtuo nga dunay kalambigitan sa krimen si  Jenalyn kay mao man kini ang nagdala kang Fernandez sa balay sa mga Montebon. Si Chiong nagplanong pakigkitaan ang ginikanan ni Montebon ug si Radoc  aron pabuksan pagbalik ang imbestigasyon aron makab-ot ang hustisya sa kamatayon ni Karen.

Mibahad si Chiong nga kung dili paminawon sa kapolisan iyang hangyo modangop sila sa National Bureau of Investigation -7 aron maoy mohimo niini.

Di mokiha

Apan ang amahan ni Karen nga si James miklaro nga wala sila’y planong kasohan si Jenalyn ug gusto nilang maka “move on” human sa nahitabo sa ilang pamilya.

Nagpasalamat usab sila sa gihimo sa kapolisan ug giisip nilang nakab-ot na sa ilang anak ang hustisya human sa gidangatan sa imbestigasyon diin napalgan na lang nga patay ang suspek.

Apan giangkon niya nga dili sila makaingon nga nalipay kaayo sila sa pagkamatay sa suspetsado kay dili na man mabalik ang kinabuhi sa ilahang anak.

Way testigo

Ang hepe sa Getafe Police Station nga si Insp. Marcelino Mejias nga nahinabi sa Banat News mibutyag nga blangko pa gihapon sila sa ilang imbestigasyon pag-ila sa mga mamumuno ug motibo pagpatay kang Fernandez.

Sumala pa niya wala silay nakuhang testigos sa hitabo. Samtang ang igsuong babaye ni Fernandez wala usab makahatag kanila og impormasyon nga makatabang sa pagsulbad sa kaso.

Sigun pa ni Mejias nga mitug-an kanila ang igsuon ni Fernandez nga 14 na ka tuig silang wala magkita ug nakurat pa kini sa kalit pagabot sa igsuon.

Ang iyang igsuon wala masayod nga nalambigit sa brutal nga kremin   si Ruben, diha ra niya kini nahibaw-an dihang napusilan na kini ug dunay mga polis nga nangita sa igsuon. (Christell Fatima Tudtud, Decemay Padilla, Rowena Capistrano ug Jojo C. Ugdol/EIM)  (BANAT NEWS)