CEBU, Philippines – Website sa National Telecommunications Commission (NTC) gi-hack sa grupo sa mga hackers tungod sa gihulagway nila nga walay aksyon batok sa kahinay sa internet sa nasud.
Ang website sa NTC gipulihan og itom nga background nga adunay nakasuwat nga mensaheng “We, Anonymous Philippines, are sympathizing with our fellow Filipino netizens whose battle cries are the ‘OVER PROMISED, UNDER DELIVERED’ system of our internet service providers; it is the neigh direct proportionality of our internet speeds and bandwidths in relation to price.”
Ang grupo Anonymous Philippines maoy ni-hack sa NTC website, matud pa sa grupo pwerteng hinaya sa internet speed dinhi sa Pilipinas apan parehas ra o mas mahal pa og gibayran ang mga Pilipino sa presyo sa internet itandi sa ubang mga nasud nga paspas kaayo og internet.
Matud pa nila kinahanglang tinud-anay nga ‘unlimited’ ang serbisyong madawat sa mga Pilipino. Matud sa grupo, kinahanglan nga ang 2 megabyte (MBPS) dili 56 kilobytes per second.
Sumala pa sa maong report, ang pag-atake sa mga hackers natunong sa pagpangandam sa NTC pag-testing sa internet speed sayo niining semanaha.
Ang Anonymous Philippines gipasanginlan kaniadto nga responsable sa pag-hack sa ubang mga ahensya sa gobiyerno ingon man mga Chinese government office websites sa nanglabay nga mga tuig. (Gikan sa Wires/EIM)