CEBU, Philippines - Nadakpan ang siyam ka tawo ug moabot sa kapin P200 mil nga kantidad sa shabu ang nasakmit sa mga sakop sa Criminal Investigation and Detection Group-7 sa gihimo nga pagpangronda sa usa ka drug den sa sitio Pagutlan, Maslog, dakbayan sa Danao pasado alas 11 kagahapon sa buntag.
Ang mga nadakpan mao sila si Ariel Senico Quimbo, Erwin Navasquez Alvaracin, Awaimar Pilapil Pulmar, Nino Joy Bobo Robles, Joven Lansadera Morre, Franco Contecalvo Conde, Bonifacio Cabahug Jr, Dindie Pepito Tejero ug Joseph Mag-usara Bensing.
Apan ang nagdumala sa drug den nga giila lang nga si Dodong ang naka-eskapo.
Matud ni Senior Police Officer 3 Roel Leyson sa CIDG-7 nga atol sa ila’ng pagronda sa drug den nagdasok ang mga tawo sa sulod nga daw nag-piyesta. Ang operasyon gihimo human sila nakadawat og impormasyon gikan sa mga residente sa dapit may labot sa naghitak nga pagpamaligya og drugas sa lugar ug sa drug den nga naglihok sa mao’ng dapit. Apan atol sa paghamag sa kapolisan nga gipangulohan ni Supt. Fermin Armendarez III, naglumbaanay ug nangsutoy og dagan ang ubang tawo sulod sa drug den diin siyam ang nadakpan human nababoy sa mga polis.
Narekober sab sa mga awtoridad ang duha ka dagku’ng putos ug 35 ka gagmay nga pakete sa gituohang shabu nga kantidad og P236,000.
Usa sa mga dinakpan nga si Morre nga nahinabi sa mga tigbalita nitug-an nga usa ka alyas Boboy ug Dodong ang nagdumala sa drug den nga ila’ng gisudlan.
Matag adlaw sab daw sama sa piyesta ang mao’ng lugar gumikan sa kadaghan sa mga drug users nga mobisita sa mao’ng dapit.
Sa halos tuig nga naglihok ang mao’ng drug den sa lugar, karon pa sab nabisto ug nabungkag sa kapolisan. (Jojo C. Ugdol/GMR)(BANAT NEWS)