CEBU, Philippines - Sa sunod tuig pa makasinati ang Sugbu sa grabeng epekto sa El Niño phenomenon o huwaw sugod sa buwan sa Enero ngadto na sa buwan sa Hunyo sumala pa sa pagbanabana sa Pagasa-Mactan. Karong panahona nakasinati na ang Sugbu sa kainit sa panahon apan di pa kini epekto sa huwaw kay normal pa kini nga temperatura.
Matud ni Oscar Tabada, pangulo sa Pag-asa Mactan nga kun molapas na sa normal nga 33 degrees Celsius ug 28 degrees Celsius ang normal nga giiniton sa klima.
Hinuon matag adlaw managlahi ang temperatura kay mag-agad kini sa hanging habagat ug amihan nga makapausab sa dagan sa kahimtang sa panahon.
Apan bisan pa niini, gipasidan-an ni Tabada ang publiko nga kun lapas 29 degrees Celsius na gani makadaot kini sa panglawas sa tawo , hayop ug bisan sa mga pananom.
Ang mga local disaster managers gikan sa nagkadaiyang local government units sa lalawigan sa Sugbu mipatawag na og panagtigom aron pangandaman ang epekto sa El Niño ilabi na sa hulga niini sa suplay sa tubig.
Giawhag ang tanan nga mangandam og sudlanan sa tubig ug magpundo niini kun moulan aron dunay magamit sa mga pananom. (Renan Alangilan/EIM)(BANAT NEWS)