Siyudad nanghatag og insentibo

CEBU, Philippines - Nakadawat na ang mga opisyal sa barangay sa dakbayan sa Sugbo sa ilang insentibo  kagahapon gikan sa kagamhanan sa Sugbo.

Ang siyudad nigahin og P7.2 milyones alang sa 80 ka barangay kapitan sa dakbayan ug 560 ka konsehal ,80 ka barangay treasurers ug 80 ka barangay secretaries.

Matud ni City Treasurer Diwa Cuevas nga makadawat og tag P15 mil ang kapitan, tag P9 mil sa mga konsehal ug tag P6 mil sa treasurer ug P6 mil sa secretaries.

Apan si Cuevas miingon nga ang incentives nga madawat kuhaan og 10% nga tax sa dakbayan.

Mao kini ang ikatulo nga higayon nga nakadawat sa ilang incentives ang mga opisyal sa barangay karong tuiga.

Samtang gihangyo sa konseho sa dakbayan sa Sugbo ang executive department nga patas-an ang ayuda nga ihatag sa kagamhanan sa Sugbo ngadto sa mga Persons with Disability (PWD) sa dakbayan.

Buot sa konseho himuong P12 mil kada tuig ang dawaton sa mga PWDs gikan sa P5 mil matag tuig pinaagi sa resolusyon nga giduso ni Konsehal Richard Osmeña.

Si Mayor Michael Rama buot nga ibase sa kategoriya sa kagrabehon sa ilang kahimtang ang ihatag nga insentibo aron dili abusohan. (Sheriza Mae R. Uy/EIM)(BANAT NEWS)