7TH Cebu District aprubado na

CEBU, Philippines - Nadugangan na og usa ka distrito ang lalawigan sa Sugbo human gipirmahan ni Presidente Benigno Aquino III niadtong Huwebes ang House Bill No. 4427 alang sa katukoran sa ikapitong distrito sa Sugbo.

Mao kini ang gibutyag ni Gob. Hilario Davide III kagahapon sa buntag  nga nakadawat siya og text gikan sa Malacañang nga napirmahan na kini sa pangulo.

Sila si Kongresista Wilfredo Caminero sa ikaduhang distrito, Benhur Salimbangon sa ika-upat nga distrito, Aileen Radaza sa Lapu-Lapu City Lone District ug Gwendolyn Garcia sa ikatulong distrito mao ang nag-author sa maong bill.

Ang ika-pitong distrito langkuban kini sa lungsod sa Dumanjug, Ronda, Alcantara, Moalboal, Badian, Alegria, Malabuyoc ug Ginatilan. Giawhag ni Davide si Caminero kinsa maoy principal author sa bill nga mo-request kini sa Comelec nga moisyu og supplemental resolution aron magahinan og pundo ug pwesto ngadto sa kongreso ang bag-ong distrito.

Si Bokal Peter John Calderon ang padaganon nga kongresista sa maong distrito ug si Bokal Joseph Baricuatro ug Jerome Librando kinsa bise mayor karon sa lungsod sa Barili ang padaganon sa Liberal Party isip mga board members.

Sa laing bahin, si Provincial Comelec officer, Ferdinand Gujilde nagkanayon nga niadtong Agosto 31, 2015 maoy kataposang adlaw nga ang Comelec mo-allocate og dugang distrito.

Apan niining ulahing kalamboan pwede maamendahan sa Comelec en banc ang unang resolusyon aron mahatagan og pundo ang ikapitong distrito hangtud sa Oktubre 12, 2015 o atol sa adlaw sa filing sa Certificate of Candidacy (COC). (Brenda D. Batuto/EIM)(BANAT NEWS)