CEBU, Philippines - Higpit karong gibantayan sa mga sakop sa City Disaster Risk Reduction and Management Office (CDRRMO) ang mga molupyo sa bukirang barangay sa dakbayan sa Mandaue sa paglikay sa dugang hitabo sa pagdahili sa yuta nga mokalas og kinabuhi.
Si Felix Suico Jr., CDRRM Officer, nga nahinabi sa Banat News niingon nga ang mga molupyo nga nahimutang sa kuyaw nga lugar ilang awhagon sa paghiklin sa luwas nga lugar sa panahon nga masinati ang pagbunok sa kusog nga uwan.
Ang higpit nga pagbantay sa kahimtang sa mga molupyo sa bukirang bahin sa dakbayan ang natigayun human sa pagdahili sa riprap sa giugmad nga subdivision sa sitio Canghang-at, Tawason nga nakapatay sa 13-anyos nga bata.
Ang Aidfaz Development Corp. ang developer sa Villa Sebastiana Subdivision.
Nasayran sa Department of Environment and Natural Resources-7 nga ang Aidfaz Development Corp. nagsugod sa ila’ng kaugmaran nga wala makakompleto sa ila’ng pagkuha og Environmental Compliance Certificate. (Romeo T. Limpangog/GMR)(BANAT NEWS)