Duha ka motor nadisgrasya sa lungag sa SRP

CEBU, Philippines - Duha ka motorista ang nangaangol diha sa South Road Properties (SRP) tungod sa pagkabulasot sa lungang sa dalan nga gibuslutan sa usa ka kontraktor nga wala’y pagtugot gikan sa siyudad.

Matud ni Cebu City Transportation Office (CCTO) Executive Director Atty. Rey Gealon ilang gi-impound ang ekipo sa kontaktor kay wala kini permit ug wala usab gani kini early warning device aron makabantay ang mga motorista nga mangagi sa lugar ilabi na panahon sa gabii.

Gihimakak sa duha ka trabahante sa Pilipinas Water Resources Inc. nga wala nila tabuni og steel plate ang bangag apan gibasol hinuon nila ang kadangog sa dalan tungod sa pagbunok sa uwan maong nadisgrasya ang duha ka motor. Si Roger Panebio, trabahante sa kontraktor nibasol usab sa mga naaksidente nga paspas kaayo og padagan sa mga motor.

Ang ekipo gibutang una sa CCTO ug iuli lang kini kun mahuman ang imbestigasyon sa nahitabong disgrasya sa duha ka motorsiklo niadtong usang gabii ug ila usab iduso ang resulta sa kagamhanan sa siyudad uban sa pagrekomendar nga ipahunong ang road digging sa PWRI.  (BANAT NEWS)