CEBU, Philippines - Gipasaka na ang kaso’ng frustrated murder batok sa kapuyo sa boksidor nga si Malcolm “Eagle Eye” Tuñacao kinsa kasamtangang nalandig sa tambalanan tungod sa mga samad tinigbasan nga naangkon sa iya’ng kalawasan. Si Sharlyn Misa, 19-anyos nga anak ni Tuñacao sa orihinal nga asawa, ang nipasaka sa kaso batok ni Jessica Grace Tiu, 39-anyos.
Si Sharlyn nga nahinabi sa Banat News niingon nga nagtrabaho sa gawas sa nasud ang ila’ng inahan hinungdan nga siya ang nibarug sa pagpasaka og kaso sa kapuyo sa iya’ng amahan.
Matud pa nga katapusan niya’ng gikakita ang amahan niadto’ng Martes sanglit sa panimalay man sa ila’ng apohan nga ginikanan sa ila’ng inahan sila nagpuyo kauban sa duha ka manghud nga 16 ug 14-anyos.
Dugang ni Sharlyn nga nagkuyog pa ang iya’ng amahan ug ang kapuyo niadto’ng Martes.
Giingong dugay na nga nagkabuwag ang orihinal nga asawa ni Tuñacao hangtud nga gikapuyo ang suspek sulod na sa 11 ka tuig.
Matud ni Police Officer 3 Juanito Bulahan sa Presinto 5 sa Mandaue City Police Office (MCPO) nga naghingapin nga pangabugho gyud ang hinungdan sa pagpanigbas. Si Bulahan niingon nga nahinanok sa pagkatulog ang biktima sulod sa ila’ng panimalay ug nahigmata na lang kini sa pagpanigbas sa suspek. (BANAT NEWS)