CEBU, Philippines - Padayung niawas ang Buhisan dam sa Metro Cebu Water District tungod sa kanunay nga pag-uwan hinungdan sa panawagan ngadto sa mga namuyo sa ubos nga bahin sa pagbakwit.
Ang MCWD una na nga nanawagan sa kagamhanan sa dakbayan sa Sugbo niadto pa’ng tuig 2013 nga lihokon na sa dali’ng panahon ang pagbalhin sa mga namuyo.
Kalit nga nisaka ang tubig sa sapa sa Buhisan sumpay sa Kinalumsan niadtong Martes sa hapon human sa dul-an usa ka oras nga kusog nga pag-uwan.
Naanod usab ang dili mominus sa 10 ka pamilya nga nagpuyo ilawom sa taytayan sa eskina Panganiban, barangay Pahina San-Nicolas, dakbayan sa Sugbo human nisaka ang tubig sa sapa.
Gipasabot ni Charmaine Kara, MCWD public affairs department manager, nga sulod lang sa dul-an usa ka oras kalit nga nisaka ang tubig sa Buhisan dam gikan sa 5,000 cubic meters ngadto sa kapin 10,000 cubic meters.
Ang maximum capacity sa Buhisan dam moabot sa 10,000 cubic meters diin hangtud niadto’ng Miyerkules sa gabii kanunay nga nagtingug ang alarm system nga nagpasabot nga niawas na ang dam.
Gitug-an ni Kara niadto’ng Hunyo nga anaa na lang sa 1,200 cubic meters ang dam apan sa tunga-tunga sa buwan hinay-hinay kini’ng nisaka ug niadto’ng Martes niabot na sa 5,000 cubic meters.
Giklaro sa ahensiya nga wala sila nagpagawas og tubig gikan sa dam.
Matud pa nga kini ang labi’ng una’ng hitabo niini’ng tuiga nga wala damha tungod sa gipangandaman nga epekto sa El Niño phenomenon.
Ang barangay Tisa, Labangon ug Mambaling ang giila sa pagtuon niadto’ng 2008 nga labi’ng maapektuhan kun adunay mahitabo’ng pag-awas sa dam.
Kasamtangan una’ng gipawong ang mga ground wells palibot sa Buhisan dam aron ang tubig sa dam mao gyud una ang mapaagas ngadto sa mga konsumedor. (BANAT NEWS)