CEBU, Philippines - Nibahad ang Department of Social Welfare and Services sa siyudad sa Sugbo nga ilang kasohan og child abuse ang mga ginikanan sa mga batang libudsuroy nga ilang na-rescue kun di sila makatuman sa ilang gipanaad.
Matud pa sa pangulo sa DSWS Ester Concha, nahurot nila paghatod pauli sa ilang tagsa-tagsa ka panimalay ang mga batang libud-suroy ug nisaad ilang mga ginikanan nga dili pasagdan ilang mga anak. Matud pa niya, padayunon nila ang pagpaniid niining mga bataa ug kun mahibaw-an nilang wala makatuman sa panaad ang mga ginikanan sampolan nila kini pagpasaka og kaso.
Sa pagkakaron, bugtong mahimo sa siyudad mao ang paghatud sa mga batang ilang maluwas gikan sa kadalanan balik sa ilang mga ginikanan tungod kay kuwang sa pasilidad nga makaatiman kanila.
Gibutyag ni Concha nga adunay pipila ka mga na-rescue na kaniadto ang namalik sa karsada kay wala’y makaon sa ilaha ug way klarong pag-amuma sa mga ginikanan. Ang pangulo sa Cebu Environmental Sanitation Enforcement Team Grace Luardo, nitug-an sa Banat News gipaubos sa counseling ang mga batang ilang na-rescue aron ilang masayran kung unsa ang tinud-anay nga estorya nganong sila naglibud-suroy una pa sila gihatud balik ngadto sa ilahang pamilya. (BANAT NEWS)