CEBU, Philippines - Dead on the spot ang upat ka mga batan-on nga naglakip sa usa ka anak sa kapitan sa barangay ug duha ang naangol human napasok sa natumbang punoan sa mangga nga nababag sa kalsada sa barangay Fortaleza, lungsod sa Tuburan sa nakalabay nga gabii.
Ang mga namatay mao sila si Eliezar Dacaldacal Jr,18, anak og barangay kapitan, Clark Anthony Enguilo, 18, Rallyboy Dacaldacal, 18, ug Jusver Bulat-ag, 27, puros nagpuyo sa Barangay Old Bago, lungsod sa Asturias kinsa luwan sa duha ka motor.
Samtang nangaangol ang mag-agaw nga sila si Rex Sasis, 22 ug Isagani Sasis, 22, nga luwan usab sa ikatulong motorsiklo.
Sumala pa sa hepe sa Tuburan Police nga si Senior Insp. William Homoc nga nahinabi sa Banat News kini miingon nga ang drayber sa mayor sa lungsod sa Tuburan nga nakalabay sa maong maoy nakadiskubre sa unom nga nasampak na sa natumbang punoan sa mangga.
Miresponde dayon sila si Homoc apan sa ilang pag-abot patay na ang upat ka mga batan-on nga nagbulag-bulag og kalukot sa kalsada.
Ang maong mga biktima gikatahong gikan sa Molobolo Spring sa maong lungsod nga paingon na unta mamauli sa Asturias.
Si Homoc nagtuo nga nakainom og ilimnong makahubog ang mga biktima kay gikan sila sa lingaw-lingaw ug kusog usab kaayo ang ilang pagpadagan ilabi na nga tul-id kaayo ang dalan sa maong dapit.
Nasayran sab sa kapulisan nga naglumbaanay ang tulo ka mga motorsiklo ug ang mag-agaw nga Sasis maoy naulahi hinungdan nga nakahimo pa sila sa pag brake human ilang nakita ang duha ka motorsiklo nga nangapasok sa sanga sa kahoy apan nalimbuwad gihapon sila.
Duna untay suga ang poste sa lugar apan napalong kay natumbahan sa punoan ug ang mga sanga ug dahon mitabon sa kalsada ug sa punoan maong maayong pagkasampak sa upat nga way mga helmet. (BANAT NEWS)