CEBU, Philippines – Gibanabanang kapin ug kulang 300 ka mga job order employees sa dakbayan sa Talisay ang nagmartsa diha sa session hall sa dakbayan sa Talisay kagahapon sa buntag tungod kay wa sila masweldohi.
Ang konseho maoy gituohan sa mga JO nga nakaingon nganong wa makadawat sa ilang gitrabahuan tungod sa paglaslas sa budget ni Mayor Johnny V. de los Reyes.
Apan ang konseho pinangulohan ni Bise Mayor Romeo Villarante mipasabot pinaagi sa mga department heads ug gitagsatagsa og gitubag ang mga isyu bahin niini.
Si Budget Officer Edgar Mabunay mipasabot nga naghinobra gyud ang gipangkuha nga JO sa mayor maong naapikihan ang panudlanan sa siyudad pagpasweldo kanilang tanan.
Si Mabunay miingon nga adunay gigahin nga budget ang konseho alang sa tuig 2015 alang sa 600 ka mga JO apan sa aktwal nga swelduhanan miabot na kini og 1,000.
Apan si Emily Cabrera, kinsa bag-ong gitudlo nga Human Resource Department head miingon sa konseho nga moabot gyud unta og 1,800 ka JO ang kuhaon sa siyudad.
Apan dihang gipangutana siya ni Villarante kun unsa ang iyang gibasehan niini, wa makatingog si Cabrera atubangan sa mga konsehal.
Sa nasayran nga ang Commission on Audit aduna'y kamandoan sa mayor nga minusan ang pagkuha og job order employees aron dili maapiki ang panudlanan sa siyudad kay gawas sa sweldo sa mga tawo duna pay ubang importanteng galastuhan ang siyudad.
Ang mga nag-rally ang nakasulod sa session hall apan ang uban ang naa lang sa gawas naminaw sa loud speaker sa gawas.
Samtang si Konsehal Edward Alesna, kinsa tsirman sa komitiba sa budget nagkanayon nga wala'y rason ang siyudad kun nganong dili maswelduhan ang mga JO sa buwan sa Agosto gumikan kay aduna man sila'y gipasar nga supplemental budget no. 3 nga gipangayo sa mayor.
Si Jema Ausa nga usa ka JO nga nisalmot sa rally ang mitug-an sa Banat News nga unta ang mga opisyales sa Talisay ang magkahiusa aron sila'ng mga kabus nga nanarbaho lang dili maapektuhan.
Sa katapusan, nagkauyon ang konseho ug mga department heads sa pagmando ni Cabrera pagduso sa lista kun pila gyud ang gikinahanglang JO ug kun unsay ilang gitrabaho.
Si ABC President Raul Cabanero mibutyag nga sa iyang barangay aduna'y mangabot nga mga tawo nga magpailang job orders nga gidestino diha sa iyang barangay apan way mga dokumento silang gipakita kun unsa ilang trabaho. – /EIM) (BANAT NEWS)